सावल्या...

मिट्ट काळोखात होत्या गूढ काही सावल्या
भूतकाळातील पापांच्या उशाशी सावल्या

जागतो सैतान देही आज कोणा पाहुनी
चेहऱ्याला नाव होते, या निनावी सावल्या

गाडले होतेस ज्यांना खोल तू अपुल्या मनी
त्या भुतांच्या खेळती आता जिवाशी सावल्या

जोडले नाते तनुशी कालपावेतो जरी
या निघाल्या आज करण्या बेइमानी सावल्या

जीवनाचे सत्त्व सारे शोषले जळवांपरी
जीव माझा घेउनीही का उपाशी सावल्या

काय तृप्तीच्या बढाया मारता माझ्यापुढे
पोटभरल्या माणसांच्याही अधाशी सावल्या

शाप त्यांना, सांग, कोणी हा विदेहाचा दिला
मांडती दावा उभा बघ इंद्रियांशी सावल्या

सुविचार

* आयुष्यात भावनेपेक्षा कर्तव्य मोठे असते.

* जग प्रेमाने जिंकता येतं; शत्रुत्वाने नाही.

* ज्याने स्वत:चं मन जिंकलं त्याने जग जिंकलं.

* यश मिळवण्यासाठी सगळ्यात मोठी शक्ती-आत्मविश्वास.

* मित्र परिसासारखे असावेत म्हणजे आयुष्याचं सोनं होतं.

* प्रतिकूलतेतही अनुकूलता निर्माण करतो तोच खरा माणूस !

* अपयशाने खचू नका; अधिक जिद्दी व्हा.

* आपल्यामुळे दुसऱ्याला दु:ख होईल असे कधीही वागू नका.

* निघून गेलेला क्षण कधीच परत आणता येत नाही.

* खऱ्या विद्यार्थ्याला कधीच सुट्टी नसते. सुट्टी ही त्याच्यासाठी नवं काहीतरी शिकण्याची संधी असते.

* सत्याने मिळतं तेच टिकतं.

* जो दुसऱ्यांना देतो त्याला देव देतो.

कधी कधी असंच....!!!

एकमेकांच्या नजरेत,
एकमेकांना शोधायचं ;
भेटल्यावर पुन्हा,
एकमेकांत हरवुन जायचं ;
नातं मनाचं मनाशी, असंच फुलवायचं १

एकमेकांना भेटण्यासाठी,
आतुर असायचं ;
स्वप्नातही एकमेकांच्या
सोबत रहायचं ;
नातं मनाचं मनाशी, असंच फुलवायचं २

कधी कधी असंच,
लटकं लटकं रागवायचं ;
कधी कधी असंच,
खोटं खोटं भांडायचं ;
नातं मनाचं मनाशी, असंच फुलवायचं ३

स्वत:साठी जगणं,
विसरुन जायचं ;
एकमेकांनी एकमेकांशी,
एकरुप होवुन जायचं ;
नातं मनाचं मनाशी, असंच फुलवायचं ४
मनाच्या खोल गाभार्‍यात, हळुवार जपायचं.