अशी दिवाळी येइल का ?

दीप उजळले दारोदारी, मने मात्र बुडली अंधारी

तिमिरहारिणी तेजदायिनी अशी दिवाळी येइल का ?

मनामनातुन दीप उजळती विश्वासाचे सौहार्दाचे
वैविध्यातुन एकत्वाचे स्वप्न खरे ते होइल का ?

स्वार्थ, विकारां मात देउनी भ्रष्ट-राक्षसा खडे चारुनी
समाजपुरुषा जागविण्याचे, पडघम कानी पडतिल का ?

रगांतुन संगती साधुनी, एकत्वाच्या कुंचल्यातुनी
रांगोळीसम मंगलमय ते चित्र कुणितरी रेखिल का ?

अशी दिवाळी खरीच यावी, याची डोळां मला दिसावी
परमेशा ही आस मनीची, सांग पुरी तू करशिल का ?